विगत १३ दिनदेखि विभिन्न माग राखी अस्थायी शिक्षक आमरण अनशनमा बसेका छन् । शान्तिवाटिकामा अनशन बसेका अस्थायी शिक्षकहरुको मुख्य माग शिक्षक सेवा आयोगले स्थायीका लागि लिएको परीक्षामा अनुत्तीर्ण भएपछि विस्थापित नगर्नलगायतका छन ।
शिक्षक सेवा आयोग ले लिएको परिक्षामा अनुत्तिर्ण भए पनि अस्थायी शिक्षकलाई कुनै पनि बहानामा विस्थापित नगर्न र पुनः आन्तरिक परीक्षाको व्यवस्था गरी स्थायीको प्रक्रियामा लैजानुपर्ने उनीहरूको माग छ ।
शिक्षा ऐनको नवौँ संशोधनमा भने आन्तरिक परीक्षामा अनुत्तीर्ण भएका अस्थायी शिक्षकले स्वतः अवकाश पाउने उल्लेख छ। आन्तरिक परीक्षामा अनुत्तीर्ण भएका शिक्षकले अहिले रोजगारीको निरन्तरता हुनुपर्ने माग गरेका छन् ।
अस्थायी/करार शिक्षक केन्द्रीय संघर्ष समितिका अनुसार परीक्षाका लागि फारम भरेका करिब २६ हजारमध्ये १२ हजारभन्दा बढी अनुत्तीर्ण भएका छन् ।
